CM Hawla leh AR hotu ber an inkâwm

Chief minister Lal Thanhawla chu nimin khan a chenna banglaah Assam Rifles hotu ber, director general Lt.Gen. Shokin Chauhan leh a nupui Daphne Chauhan ten an hmu a; ram venhimna, ramri chungchang leh thil dang pawimawhte a sawipui.

CM Lal Thanhawla chuan, Assam Rifles chu Mizoram leh Mizo mipuiah an mikhual lo tih sawiin, "Kan inlaichìnna a ṭha chho zel a ni," a ti a; kawng hrang hrangah tun hma atangin Assam Rifles-in mipui an ṭanpui ṭhin avangin mipui rilruah Assam Rifles-in hmun pawimawh tak a la luah renga a hriat thu a sawi.

Lal Thanhawla chuan, ramri venhimna hna chu Assam Rifles aia ṭhaa thawk tur an awm loa a hriat thu a sawi a; Myanmar ramri venhimna hna BSF thawhtir rawtna tun hmaa lo awm tawh ṭhin chu tha a tih loh thu a lo sawi tawh thu Lt. Gen. Shokin Chauhan a hrilh.

Assam Rifles DG Lt. Gen. Shokin Chauhan chuan, AR-te leh an awmna hmuna mipuite inlaichìnna tihngheh a nih theih nan Military Civic Action programme kaltlangin hmun kilkhâwra awmte mamawh zualpui phuhru turin hma an lak ṭhin thu a sawi a; tun hnaiah Parva II-ah solar light an dah thu a sawi.

Ramri hrûla venhimna a ṭhat tâwk thu sawiin Lt. Gen. Shokin Chauhan chuan, Myanmar nena thawhhona leh inlaichìnna ṭha zawk a awm theih nan ramri hrûla lui dungah Indo-Myanmar Expedition huaihawt an tum tih CM a hrilh.

Mizorama football chawikanna atana Under-19 (mipa leh hmeichhia) Football Tournament huaihawt an tum thu leh Mizoram paltlanga Myanmar leh Bangladesh kaltlang turin Bike Rally buatsaih a duh thu a sawi bawk.

Assam Rifles DG hi Inspector General (East) Maj.Gen. Bhupinder Dwivedi leh AR 23 Sector HQ commander Brig. MS Mokha ten an ṭawiawm a ni.