Champhaiah bandh chhunzawm

MZP headquarters, Champhai chuan Cham­phai District Hospital-ah doctor leh thawktu dang dah belh tura sorkar kar nana total bandh an huaihawt chu nimin khan nilengin an chhunzawm a; vawiin aṭangin tiam chin awm loin sorkar pisa leh zirna inte an khâr dawn.

Champhai damdawi-ina doctor dah phût nan hian Champhai MZP hian April 18 khan Champhai khawpui huam chhungah total bandh an lo huaihawt tawh a, zan lama an tihtawp lailâwk hnuah, an thil phût a hlawhtlin loh avangin nimin khan bandh hi an huaihawt leh a ni.

Total bandh avang hian Champhai khawpui chhunga zirna in, sorkar pisate leh dawrte khâr a ni a, hmun hrang hrangah MZP aiawhte duty-in, khawlaia chhuak tur an veng a, buaina leh har­satna a awm hriat a ni lo. Bandh hi nimin tlai dar 5:30 khan an titawp rih.

Champhai MZP joint secretary Lalram­nghetzuala hnen aṭanga thu dawn danin, sorkar aṭanga thu lawmawm an hmuh loh avangin vawiin aṭang hian tiam chin awm loin Champhai khawpuia sorkar pisa leh zirna-in zawng zawng an khar dawn.

MZP thuchhuah chuan, sorkara an phût an karnaah mipuiin harsatna nasa zawk an tawh loh nan leh na zawka sorkar nawr nan sorkar pisa leh zirna-in zawng zawng khâr an tum tih a tarlang. Pisa leh zirna-inte khâr a nih theih nan hian Champhaia college leh higher secondary school zirlai zawng zawngte zing dar 8-ah CHANEM-ah kal khawm turin an hriattir.

Champhai MZP chuan, an hmalakna chu thláwp turin tlawmngai pawl hrang hrangte leh mipui an ngen a ni.