MADC inthlan turah Mi 76-in hming pe lut

May 4-a Mara Auto­nomous District Council (MADC) inthlan turah chuh tumte tana hming pek luh hun chu nimin tlai dar 3 khan a tawp a, mi 76-in hming an pe lut.

Nomination paper thehlut mi 76 zinga 25 chu Congress party candidate an ni a, mi 13 chu Mara Democratic Front (MDF) party candidate niin, mi 12 chu MDF nena thawk dun MNF candidate an ni. Mi pakua chu BJP candidate an ni a, independent-a ding turin mi 17-in hming an pe lut bawk.

MADC-a chief exe­cutive member ni lai RT Zachono chuan Amotlah bialah Congress ticket-in nomination a file a; MDF president M Laiko chu Laty bialah a ding dawn a, Siaha MNF president N Viakhu chu Siaha South-II bialah a ding dawn.

MADC chairman ni lai LC Chakhai chu Siaha East-I bialah, deputy chairman Priscilla chu Zyhno bialah an ding dawn a; executive member ni lai K Chhuahbei, K Hrahmo, F Lawmkima, KH Beihlo, VB Byhna, MH Tiabi, N Zakhai leh IP Junior ten nomination an file bawk.

Nomination paper-te hi vawiinah endik a ni ang a, naktuk tlai dar 3 thleng inhnuhdawhna hun hawn a ni ang.