MJA-ten Raj Bhavan leh Assembly House tlawh

Mizoram Journalists' Association (MJA) member-te chuan, an president Vanlalrema Vantawl hoin nimin khan Raj Bhavan leh Assembly House an tlawh a, hmun hrang hrang an fang.

MJA member-te hian Mizoram Legislative Assembly House an tlawh hmasa a, Assembly Secretariat hotute'n an lo dawngsawng. Ram hruaitute rorelna hmun Assembly House bakah, Assembly Library-te an tlawh a ni.

Raj Bhavan an tlawh­naah MJA member-te hi Governor Lt. Gen. Nirbhay Sharma leh a nupui Jyotsna Sharma ten lo dawngsawngin, Durbar Hall-ah an inkâwm a; Larsap hi secretary leh IPR secretary Biaktluanga, IPR director Lalni­thangi leh IPR joint director Lal­lianpuii ten an ṭawiawm.

Lt. Gen. Nirbhay Shar­ma chuan, Raj Bhavan chu Governor ta leh chenna bik a ni lo a, Mizoram mipui ta a nih thu sawiin, "Mizoram leh Mizote hmél lanna a nih avangin Raj Bhavan mawina leh zahawmna chhawm nun hi kan mawhphurhna ṭheuh a ni," a ti.

Ram leh khawtlang hmasawnna leh a siam ṭhatna kawngah tun hma zawng aiin journalist-te mawhphurhna a sang tawh tih sawiin Larsap chuan, "Sorkar beng thlenna tura mipui aw an nih bakah, sorkar hmalakna mipui hriattirtu an ni," a ti a; mipui zirtir kawngah ṭan la lehzual turin chanchinbu mite a chah.

Governor chuan, Mizo­ramin remna thuthlung a neih hnuah India rama state rálmuang ber pawl a nih thu te, lehkhathiam tamna, kohhran leh tlawmngai pawl chakna a nih thu sawiin, "State dangte tana entawntlak 'model state' ni thei a nih laiin, mipuite'n kan nih tur ang kan ni pha lo a, kan thlen chin tur kan thleng pha tâwk lo ," a ti.

Mizoramah cancer, HIV/AIDS, ruihhlo leh vaihlo ti leh zu vanga buaina a tam chu mutmawh hnarmawha neih a ngai tih sawiin Larsap chuan, mipui nunphung a hrisel zawk theih nan leh mipui tihmasawn tura ṭan la turin MJA member-te a sáwm a ni.

MJA president Van­lalrema Vantawl pawhin thu sawiin, Mizo­ram mipui ṭhatna tura Governor-in a sawi leh a vei ṭhinte chuan Mizote a hmangaihzia leh Mizoram hmasawnna tur a veizia a tarlang tih a sawi.