KHAWTHLIR

In kâng ral
Nimin zing khawvar hma, dar 2:30 vel khan Vaitin khuaa Chawngkunga in, Assam type chu bungrua chuh hman lohin a kâng ral. Kângmei chhuah chhan hriat chian a ni lo a, Vaitin khawtlang chuan nimin khan chhiat tâwk chhung­kuate in tur hnatlangin an saksak ṭan nghal a ni.

Mizoram Watch
PRISM chuan, hun eng emaw chen an lo kalpui tawh, sorkar ding laiin an party election manifesto an bawhzui dan thlirhona programme, Mizoram Watch chu neih an tum tawh lo tih an puang. PRISM thu­chhuah chuan, nimina an pawl hruaitute ṭhu-khawmin kum 2017-18 chhunga an hmalakna tur ruahmanna an siam fel tih a tarlang bawk.

Lunglei HPC Action plan pawm
Lunglei High Power Committee chu nimin khan an chairman, chief minister Lal Thanhawla hoin a pisaah an ṭhukhawm a, vice chairman S Laldingliana, MLA leh member-te an tel. Meeting-ah hian Lunglei HPC hnuaia hna thawhte thlirlet a ni a, kum 2017-18 chhunga hna thawh tur ruahman leh action plan an siamte an pawm a ni.

Huaisen lawmman
Sorkar laipuia Ministry of Home Affairs chuan huaisen lawmman, Jeevan Raksha Padak dawng tlakte hriattirna hun a hawng a, mi dangte nunna chhan nana huaisente lawmman tan dil theih a ni. Rawtna thlen duhte tan Mizoram sorkara Home department Under Secretary hnenah August 31, 2017 ral hmain thehluh tur a ni a, rawtna chu October 1, 2015 hnu lama thleng a ni tur a ni.

MZU-ah workshop
Centre for Development Initiatives (CDI) leh Mizoram University-a Social Work department-te chuan, nimin khan MZU-ah national workshop an buatsaih a, MZU vice chancellor Prof. Lianzela khuallian a ni. Seminar thupui chu - Decent work for domestic workers’ tih a ni.