Middle school zirlaibu hnam ziaráng leh Nunphung pholang thei tura duan a ni

State Council of Educational Research and Training (SCERT) chuan, nimin khan SCERT Auditorium-ah ni hnih awh tur middle school zirlaibu thar zirchianna (sensitization programme) an buatsaih. Khuallian, School Education minister H Rohluna chuan, zirlaibu tharte chu zirna bakah, hnam ziaráng leh nun­phung pholang thei tura duan a nih thu a sawi.

School Education Minister chuan, middle school textbook thar chu hnam ziaráng leh nunphung pholang thei tura duan a nih angin, ṭhangtharte kaihruaitu a nih ngei a beiseiawm thu a sawi a; zirtirtute chu zirlaite chungah nghawng nasa tak an neih avang­in ṭhahnemngai taka thawk turin a fuih.

H Rohluna chuan, "Mizorama literacy sang ringawt hi duh tawk loin, zirlaite’n thiamna thûk zawk an neih nan ṭan lak a tul a ni," a ti a; School Education-ah kalphung a ṭha zawnga tidang­lam tura hmalak zel a nih thu sawiin, zirna piah lamah nun dan ṭha inzirtir turin zirtirtute a chah a ni.

Sensitization programme hi SCERT director Laldawngliani Chawngthu-in a kaihruai a, Aizawl district-a middle school headmaster-te an tel a ni.

Sorkar thuchhuah tarlan dan­in, middle school zirlaibu thar hi NCERT syllabus zulzuia siam a ni a; zirna leh zirtirnate chu a taka tih ngeia zir te, subject zawng zawnga ṭawng zirna ngaih pawimawh te, mahni chenna ram chanchin zir leh bye-heart system tihtàwpte a keng tel.

Kum 2015-16 academic session aṭangin Mizorama sikul zawng zawngah NCERT textbook hman ṭan niin, NCERT textbook chu Mizoram mila tihdanglam a ni a; Mizo medium leh English medium sikul zawng zawngte zir tura ruahman a ni.