Chhiatna laka invenna chungchang sawiho

State Disaster Management Authority (SDMA) chu April 18, 2017 khan chief minister Lal Thanhawla hoin Chief Minister Office-ah an ṭhu a, chhiatna laka invenna chungchang an sawiho. Sorkar laipui aṭanga sum lo kalte a ṭul anga hman theih tura chak zawka ûm zui ni se, an ti.

Meeting-ah hian UD&PA Minister Pu Zodintluanga, Health Minister Pu Lal Thanzara; Chief Secretary Pu Lalmalsawma leh DM&R Secretary Pu Zothankhuma; Director, DM&R Pu Lalpeksang­a; Member, SDMA Pu Dominic Lalhmangaiha leh official member te an tel a ni.

Chief Minister chuan, Mizoram chu lirnghing thlen tamna leh natna hmuna awm a ni tih sawiin, "Mithiamte sawi danah Mizoram din­hmun hi a him lo hle. Tun hnai lawkah Manipur leh Myanmar ramahte lir­nghing a tam tih hriat a ni. Eng angin nge hma kan lak ang tih hi sawiho pawimawh hle a ni," a ti a; Mizoram chu tlang ram, ṭhenawmte in nena inhnaih em ema in sakna hmun a nih avangin ngaihtuahna sen tam a ngaih thu a sawi.

Lal Thanhawla chuan, tuna Mizoram mipui innghahna chu silpauline leh tarpaulin a ni tlangpui tih sawiin, chu'ngte chu rei daih tur an ni lo tih a sawi a; chhiatna hrang hrang - leimin, lirnghing leh a dangte a thlen hma leh a thlen palha inven nan mithiamte thil sawite chu a taka zawm a ṭul thu a sawi bawk.

Meeting-ah hian Disaster Management & Rehabilitation (DMR) department-a thawktu indaih lohna leh hun rei tak a nghet loa thawk tawh dah ngheh dan turte sawi a ni a; Central aṭanga sum lo kalte chak zawka ûm zui an rel bakah, Aizawl leh a chhehvela leimin leh kawng chhe zual ngaih pawimawh hmasak tur chite an sawiho a ni.