Thanzara'n GAC hmun thar a enfiah

Minister Lal Thanzara chuan, nimin zing khan Mualpuia Goverment Aizawl College (GAC) hmun thar leh a panna kawngte a hmunah tlawhin a enfiah.

Lal Thanzara hian GAC hmun thar panna tur kawng a enfiahnaah, hmalak dan tur leh kawng siam dan tur sawiho a ni a; awlsam zawka campus kawng siam a nih theih nan kawng awm sate chei ṭhat tum a ni.

Kawng pakhat, Aizawl By-pass Road aṭanga meter 456-a thui chu double lane-a siam ni se, an ti a; kawng dang pakhat Salvation Army Officers’ Training College aṭanga panna metre 376-a thui chu alternate exit road atan siam ṭhat ni se, an ti.

GAC hmun thar hi bigha 9.32-a zau a ni a, SPA aṭanga sum hmuh nuai 300 hmangin Commerce block, RUSA aṭanga hmuh nuai 70 hmangin cafeteria leh student common room, UGC aṭanga sum hmuh nuai 40 hmangin womens’ hostel, parking area leh volleyball court-te siam mek a ni. Academic building, administrative building, auditorium leh library-te cheng nuai 1200 sênga sak tum a ni bawk.

Minister Lal Thanzara hi PWD, Higher & Technical department leh GAC hotute'n an ṭawiawm a ni.