Congress hi anmahni pawh an inning tawh - Tawnluia

MNF senior vice president Tawnluia chuan, Congress party chu mipuiin sorkar zel tlakah an ngai tawh lo nia sawiin, "Congress sorkar hi mipuiin an ning tawh a ni mai lo a, anmahni pawh an inning tawh," a ti.

Tawnluia hian nimin khan Khawhai Town Hall-ah MNF Tuichang South Block Conference leh Socio Economic Development Programme (SEDP) zirhona a hmanpuinaah thu sawiin, "Congress sorkar hian hmasawnna hna an thawk lo a, mipui chhiah tlingkhawmin nuam an tâwl a, lal chhungkua an invilik nasa em em a, corruption a nasa em em bawk," a ti a; zu zawrh chu Congress party tan tlâk chhan tling niin a sawi.

Kum 2018-a Assembly inthlanah MNF chu sorkar ngei turin nasa takin a inbuatsaih mek nia sawiin Tawnluia chuan, "Zoram hmun hrang hrang aṭangin party dang leh neutral-in MNF an zawm ruih ruih a, Pathian leh mipui zarah kan sorkar leh ngei dawn. MNF-in sorkarna a chang leh a nih chuan Congress sorkarin hleih nei taka ro a rel ṭhin ang hi kan titawp dawn," a ti.

MNF Senior Vice President chuan, SEDP hmangin kut hnathawktute'n eizawnna nghet an neih ngei theihna turin hma an la dawn nia sawiin, "SEDP sum tur hi budget-ah dah a nih dawn avangin sum tam tak a awm dawn a, budget pawn lama mi pawh tam tak hai luh belh a nih dawn avangin sum lamah harsatna a awm lo ang," a ti. SEDP sum chu páwng sem loin, kawngkal fel tak neia ṭanpuina tur niin a sawi bawk.