ZEDA tihlenna tur ruahmanna pawm
Zoram Energy Development Agency (ZEDA) Governing Council chu nimin khan chief minister Lal Thanhawla hoin a pisaah an ṭhukhawm a; ZEDA hmalaknate thlirletin, chak leh changtlung zawka hna an thawh theih nana ZEDA tihlenna tur ruahmanna a thuphungin an pawm.
Chief Minister chuan, khawvel sik leh sá inthlak danglam mek leh environment chhe mekah nizung leh thli chaknate a pawimawh telh telh tih sawiin, "Sorkar laipui pawhin a ngai pawimawh a, keini pawh hian engtin nge a ṭangkai thei ang bera kan hman ang tih kan ngaihtuah a ngai. Ṭan lakna tur kan nei tam hlein ka hria," a ti.
Lal Thanhawla chuan, sorkarin solar energy hmanga kawlphetha siam chhuaktu company-te an dàwr mek thu sawiin, "Mizoram tan a hlâwk thei ang berin ruahmanna kan siama solar power kan kalpui a ṭul," a ti a; solar energy leh wind energy tam zawk tihchhuah a nih theih nan ZEDA chu tihlen ṭha a tih thu a sawi.
Meeting-ah hian ZEDA project director JH Malsawma'n ZEDA hmalakna te, kum 2017-18 atana action plan an siamte leh ZEDA tihlenna tur ruahmanna an siamte a sawifiah a; ruahmannate chu a thuphungin an pawm a ni.
Power & Electricity engineer-in-chief L Pachuau-in Turini Small Hydel Project, kawlphetha megawatt 24 pe chhuak thei tura duan dan a sawifiah bawk.
Tuirini Small Hydel Project DPR hi WAPCOS siam a ni a, DPR chu Mizoram sorkara ngaihtuah tura thehluh mek a ni. Project cost chu cheng vbc. 465 niin, kum li leh a chanve chhunga thawh zawh tura ruahman a ni a; sorkarin a pawm chuan state project anga kalpui tum a ni.