Mamit Total Literacy Drive hawng

Mamit DC Lal­biaksangi chuan nimin khan Mamita IPR Conference Hall-ah mamit district-a kalpui tur Total Literacy Drive 2017 a hawng.

Lalbiaksangi chuan, Mamit district chu mi chi hrang hrang leh hnam hrang hrang chenna a nih avangin chhiarpui hnuhnung berah an hnufual bik thu sawiin, ziak leh chhiar thiam inzirtir tura ṭan lakna tur kawng tam tak a awm tih a sawi.

Mamit DC chuan, an district chhunga khaw hrang hrangah May 1, 2017 aṭangin beihpui thlak a ni dawn tih sawiin, khaw hrang hrangah School Education department bakah department hrang hrangte'n beihpui an thlak dawn tih a sawi a; chu'ng mite chu ṭha taka lo thawhpui turin mipuite a chah.

Mamit district-ah hian kum 2011 chhiarpui ang chuan, ziak leh chhiar thiam lo mi 10,678 an awm a, mipa 4,023 leh hmeichhia 6,655 an ni. Kum 2014-15 Departmental Survey-ah chuan ziak leh chhiar thiam lo zat chu mi 7,702-ah a tlahniam tawh a, chungte chu mipa 2,474 leh hmeichhia 5,228 an ni. Kum 2015-16 chhung khan Total Literacy hmalaknain ziak leh chhiar thiam lo mi 164-te thiamtir an ni bawk.