Hunthar Vengah lei che nawn

Hunthar Veng, Aizawla NH-54 kawngpui chhaka lei tlakhniam ṭhinna chhak chu tun hnai khan a che leh a, nikuma rauhsan tawh Lalrinawmi in, RCC building chu tla mai thei dinhmunah a ding nia hriat a ni.

Hunthar Veng hruaitute sawi danin, Lalrinawmi in innghahna lei hi Thawhlehni zan dar 12 vel khan a che nasa zual a, a chhuat, bang leh varanda-te a khi chat nasa hle a, a khi chat ri chu a bula awmte pawhin an hre thei a ni.

He thil thleng chungchang hi Aizawl DC hriattir a nih hnuah additional DC John LT Sanga'n a hmunah thil awm dan a enfiah a; Hunthar Veng Local Council nen an ruahman angin, Lalrinawmi in bul hnaia chhungkaw pali chu hmun him lamah sawn chhuah an nih bakah, a hnuai lama lei che zel tur venna siamtute chu chawlhtir rih an ni.