ACBOA-in conference an hmang

Aizawl City Bus Owners Association (ACBOA) chuan nimin khan Synod Conference Centre-ah General Conference vawi 44-na an hmang a; khuallian, parliamentary secretary KS Thanga chuan, kawngpui thawm ṭhat nan cheng vbc. 800 chuang sorkarin an dah thu a sawi.

KS Thanga chuan, Aizawl city bus diver leh conductor-te'n uniform an hà chu lawmawm a tih thu sawiin, an hna chu hna pawimawh a nih thu a sawi a, "Eng hna pawh hi pawimawh bik a a awm hran lo. Ram tana kan thawhna hi a pawimawh vek a ni," a ti.

Driver leh conductor-te'n mawhphurhna sang tak an nei tih sawiin, KS Thanga chuan, "Hna hnuaihnung thawk anga an inngaih chuan harsatna tam tak a thleng thei. Him tak leh thlamuang taka mipuite'n an thlenna hmun tur an thlennaah mawhphurhna an nei. Rinawm taka hnathawh hi Pathian leh ram tan a ṭha a ni," a ti a; driver leh conductor-te chu ram hmél lanna an nih avangin an nungchang leh awm dan­ah fimkhur turin a chah.

ACBOA tarlan danin, Aizawlah city bus service thei 260 vel a awm a, chu'ng zinga 220 chu a neitute enkawl a ni.