Mizorama Covid-19 vei 233 zinga Mi 159 (68.24%) an chhuak tawh

Zoram Medical College (ZMC) Covid-19 Laboratory-ah July 13, Thawhṭanni khan Covid-19 hripui vei mi pahnih hmuh chhuah leh a ni a; nimin khan hripui vei zinga dam tawh mi pariat chhuahtir an ni thung. Mizorama Covid-19 vei tawh mi 233 zinga 159 an chhuak tawh.

Thawhṭannia ZMC labora­tory-a swab sample endikte chu mipa 171 leh hmeichhia 85 an ni a, State Referral Hospital-a awm sate bakah, Aizawl, Siaha leh Serchhip aṭanga sample dawnte a ni. Mi 254-in Covid-19 an vei loh laiin, mi pahnihin an vei tih hmuh a ni. Hripui vei hmuh thar pakhat chu Aizawl district-a mipa naupang kum 12 mi, Chandigarh aṭanga July 6-a Aizawl rawn thleng a ni a; pakhat dang chu Assam Rifles sipai mipa kum 29 mi, Maharashtra aṭanga June 28-a Aizawl rawn thleng, Zokhawsanga awm mek a ni. Mi pahnihte hi khung hran lai ve ve an nih bakah, taksaa harsatna nei lo (symptom lang lo) an nih thu sorkar thuchhuahin a tarlang.

ZMC Covid-19 Laboratory-ah hian nimin khan ZMC, Aizawl, Champhai leh Khawzawl aṭanga dawn mi 200 chuangte swab sample endik leh a ni a, result hriat hman a ni lo.Hetih lai hian, Siaha district mi Covid-19 vei zinga negative tawh tih hmuh chhuah mi pariat chu nimin chawhnu dar 3 khan Siahaa Dedicated Covid Health Centre (DCHC) aṭang­in chhuahtir an ni a, mipa vek an ni. Siaha district-ah hian hripui vei vanga DCHC-a enkawl mek mi paruk an la awm. Nimin tlai dar 5 thlenga hriat theih chinah, Mizoramah Covid-19 vei mi 233 hmuh chhuah a ni tawh a, chu'ng zinga mi 159 (68.24%) chu dam taka an chhuah tawh laiin, mi 74 (31.76%)-in an la vei mek a ni.