Naupang rûkbote chungchang ngaihtuah
Mamit district naupang rûkbo, tun hnaia Uttar Pradesh-a Muzzafarnagar ashram aṭanga hmuh chhuahte chungchang chu nimin khan Social Welfare minister Dr K Beichhua hoin ngaihtuah a ni a, hmalak zui dan tur an rél.
Social Welfare Minister chuan, naupangte chunga thil thleng chu pawi a tih thu sawiin, "Tun hnuah a thlen nawn tawh loh nan mi tin fimkhur a pawimawh," a ti. Meeting-a tarlan danin, naupang chhan chhuahte chu him takin an awm tawh a, mi dang tlawhpawh theih lohin Muzzafarnagar lama Child Protection Unit enkawlna hnuaiah dah an ni. Mizoram lama hruai haw turin dan angin sorkarin hma a la mek.
Muzzafarnagar ashram aṭang hian naupang 10 chhan chhuah an ni a, an zinga paruk chu Mizoram khawthlang lama Marpara khuaa mite niin, kum 9-16 inkar an ni. An vai hian Chakma naupang an nih thu, thu dawnna chuan a sawi. March 2020 khan naupang nu leh pate hnenah an fate chu phai lama sikul ṭhaa dahsak tura insawiin hruaithlak an ni a, July 7, 2020 khan Childline team leh police-te'n Hindu sakhaw hmun ashram aṭangin an chhan chhuak a ni. An vai hian pawngsual ngei an ni tih medical test aṭanga finfiah a nih thu Indian Express chuan a tarlang.