Champhai leh Hnahlan winery-a Her turin grape an lei leh dawn

Champhai Grape Growers Society (CGGS) leh Hnahlan Grape Growers & Processing Cooperative Society (HGGPCS) chuan an winery-a her turin kut hnathawktute grape thar an leisak leh dawn.

CGGS Executive Committee nimina ṭhukhawm chuan, kumina grape lei dan tur an ngaihtuah a; harsatna hrang hrang an tawh karah, eptu party-te'n wine siam tura dodalna an nei lo tih lantirna no objection certificate (NOC) an pek hnuah, NOC chu sorkarah an thehluh tawh thu tarlan a ni.

Mizoram sorkarin MLPC Act-a wine rules a siamah wine siam chhuah phalna a pek ngei beiseiin CGGS chuan, kuminah Champhai Winery-a her tur, kut hnathawktute thar grape-te chu July 13, 2022 aṭanga lei ṭan an rél a ni.

CGGS-in a ruahman dan chuan, grape chu July 13, 2022-ah a thawh khatna atan lak ṭan tur a ni a, a bak chu a tlachawpa rêl zui turin an dah. Grape kg. khat Rs 60 zela lei tura ruahman a ni a, nikum khan grape kg. khat Rs 50-in an la ṭhin. Kuminah Society-in sum leh paiah harsatna a tawh avangin grape an leina man chu kum danga an pek chhuah hun aiin a tlai dawn a, a báa lak phawt a ni ang.

Champhai Winery hian wine siam zawh tawh, la zawrh chhuah loh chu litre 1,14,168 an nei mek a; grape an lei chhunzawm turah an lak theih zat tur hriat a la ni lo.

Hnahlan Grape Growers & Processing Cooperative Society chuan tunkar aṭangin grape an la ṭan dawn a, kg. khat Rs 60 thoin an lei dawn.

Champhai leh Hnahlanah hian grape seng hun a thleng ṭan a, a thar hmasate chuan kar hmasa aṭang khan an seng ṭan tawh. July thlaah hian a seng vanglai a thlen beisei a ni.

Grape chíngtute chuan, kumin­ah ruahtui a tlak hma bak­ah, rial a sûr loh avangin nikum aia grape an thar ṭhat an beisei thu an sawi.