NIT, Mizoramin convocation an hmang ; Kum tharah world class campus in neih ka beisei - CM

National Insititute of Technology (NIT), Mizoram chuan nimin khan Aijal Club-ah convocation an hmang a, an hun hmanpuitu chief minister Zoramthanga chuan, kum tharah NIT, Mizoram chuan world class campus an neih a beisei thu a sawi.

Chief Minister chuan, hun eng emaw chen kal tawhah NIT, Mizoram din an duh thu sawiin, "Hmalak ṭan a nih laiin forest clearance leh thil dangah harsatna a awm. Covid-19 avangin harsatna a awm leh a, harsatnate sukianga NIT campus din ngei turin theihtawp kan chhuah ang. Kum lo thar turah world class campus in neih ngei ka beisei," a ti.

Zirlai degree nei tharte chu a lawmpui thu sawiin Zoramthanga chuan, "Tunlai khawvelah mi thiam leh talent nei ṭhate'n zah an ni tawh. In suangtuahna leh thil tumte bànsan loin, hma lam hunah theihtawp chhuah ula, in mawhphurhnate hre reng ang che u," a ti a; India ram chu economy ṭhang mek a nih avangin remchànna la thiam turin zirlaite a chah.

Convocation-ah hian kum 2020-21 academic session-a degree course zo, kum 2016-17 leh kum 2017-18 a under graduate (UG), kum 2019-20 a post graduate-te leh doctor of philosophy zir ṭante hnenah degree hlan a ni.