DA tipung tura Mizoram sorkar kar nan Sorkar hnathawkte'n badge dum an bel

Sorkar hnathawk pawl hrang hrang intèl khawmna, Federation of Mizoram Government Employees and Workers (FMGEW) huaihawtin Mizoram sorkar hnathawkte chuan dearness allowance (DA) 34% pek phûtin nimin aṭang khan badge dum an bel ṭan a; July 1, 2022 thleng an bel dawn.

Tarlan tawh angin, June 13, 2022-a FMGEW Council Meeting-in a rêl angin DA pung sorkarin a pek ṭhin chungchangah June 21, 2022-a FMGEW Executive Committee ṭhukhawm chuan June 27 aṭanga July 1, 2022 thleng, tun kar chhung zawng an hnathawhna hmunah badge dum bel an rêl a ni.

FMGEW tarlan danin, thil man to zel phuhrûkna atana sorkar hnathawkte DA pung ṭhin chu sorkar laipui hnuaia thawkte chuan 34% an la mek a, Mizoram sorkar hnathawkte chuan 28% an la mek thung. Sorkar laipuia thawkte lak ang zat lâk ve an phût a, sorkarah vawi eng emaw zat an dilnain awmzia a neih loh avangin sorkar kar nan badge dum an bel ta a ni.

Bagde dum belhin awmzia a neih loh chuan hmalak chhunzawm zel tur dan tur chu rêl ṭhat leh atan an dah. 

Thu dawn danin, Mizoram sorkar hnathawkte'n February 2022 thleng khan DA 17% an la a, March 1, 2022 aṭangin 28%-ah sorkarin a tisang a, tunah 34%-ah tisang turin sorkar an nawr leh mek a ni. Sorkar laipuiah chuan DA hi July 1, 2021 aṭangin 31% a ni a, January 1, 2022 aṭangin 34%-ah tihsan a ni. July 1, 2022 aṭangin 4%-in (38%) a pung leh dawn nia sawi a ni bawk.

FMGEW chuan, Pay Rules hman mekin a tarlan dangin, DA chu sorkar laipui hnathawkte rate ang state sorkarin pek ve zel tur a ni tih a nih thu, February 2022 khan an tarlang. FMGEW hian Mizoram sorkar hnathawk pension hun hman mek, kum 60 chu kum 62-ah tisang turin sorkar an ngen mek bawk.