Central aṭanga sum hmuh tur kan hmuh loh vbc. 3,000 a tling - Zorama

MNF party chuan nimin khan Vanapa Hall-ah MNF Office Bearer's Meeting an nei a, MNF president Zoramthanga'n thu sawiin, Central-in pawisa pe kim se, hripui karah pawh harsatna a awm loh tur thu leh Central aṭanga sum hmuh tur an hmuh lohte chu cheng vbc. 3,000 a tlin thu a sawi.

Zoramthanga chuan, "Hripui vangin hun harsa tak karah sorkar chu dam khawchhuah tumin a kal. Budget-a ruahman angin pawisa hmuh kim ni se, harsatna engmah a awm lo ang," a ti a; "Kum khat leh thla 10 atan budget-a kan ziah luh kha a hlâwm lian kan hloh, Central aṭanga lo kal lo cheng vbc. 2,600 vel leh a tênau nen, a vaiin vbc. 3,000 vel a tling," a ti.

MNF hruai sorkar chuan hmalakna leh hmasawnna tam tak a nei tawh tih sawiin, "Nakkuma inthlan awm turah pawh Pathian leh mipui zarah sorkarna kan la leh ngeiin ka ring," a ti a; theihtawp chhuaha hma la zel turin MNF office bearer-te a chah.

Inkhawm hi MNF senior vice president Tawnluia'n a kaihruai a, Mizoram tana martarte sûnna hun an hmang. Kumin hi MNF diamond jubilee a nih anga hmalakna tur leh SEDP chungchangte an rél a ni.

MNF OB te chuan resolution pali - Covid-19 leng laka Chief Minister hmalakna fakawm an tih thu te, Mizoram leh Assam ramri buai Mizo­ram sorkarin a hma­chhawn dan ropui an tih thu te, Covid-19 leng kara SEDP sem a ni tur lawmawm an tih thute leh Bangladesh sorkar nen border trade hmanga insumdawn tawnna tur Mizoram sorkar hmalakna ṭha an tih thute an pass.