Kamrul-a hna hmuh zat hmangin mipui tan thil tam tak a tih theih - K Sapdanga

ZPM working presi­dent K Sapdanga chuan, kalphung thar an tih chu thil a nih dan tur dik taka nihtir a nih thu sawiin, Kamrul-a hna hmuh zat hmang ringawt pawhin mipui tan thil tam tak tih theih a nih thu a sawi.

Nimina Awithangpa Hall, Kawnpuia ZPM Tuirial West Block Political Training-ah thu sawiin K Sapdanga chuan, dan a nihna ang taka ZPM-in kenkawh an tum thu an sawite chu tunlaiah chuan kalphung thar a ni tawh tih a sawi a, "Sorkarin a dan siamte a bawhchhia a, dan bawh­chhiate hremtu an awm lo. ZPM a sorkar a nih chuan thlai thar a lei dawn a, Kamrul-a hna hmuh zat hmang ringawt pawhin mipui tan thil tam tak tih theih a ni. Thil a nih dan tur dik tak nihtir hi kalphung thar kan tih chu a ni," a ti.

Tun hma aṭangin ram siam tumin kawng hrang hrangin hma an la tawh ṭhin a, hmasawn erawh a har hle tih sawiin Sapdanga chuan, "Kan ṭhahnemngaihna kal zela kan ṭan laknaah ZPM a lo piang a, politics huangah ka lo lut ve ta a ni," a ti a; mite'n hausa tawh, tih tur neih loh vanga inhmang anga an sawi ṭhin chu thil nuihzatthlak a nih thu a sawi.