KHAWTHLIR

Governor leh NABARD
Governor Hari Babu Kambhampati chuan nimin khan Raj Bhavan-ah NABARD hotute a kâwm a; NABARD hotute chuan Mizorama an hmalakna, sorkar, bank leh mimal nena an thawhhona leh thil pawimawh dangte an thlen. NABARD hotute sawi danin, kum 2021-2022 chhungin Mizoram Rural Bank leh Mizoram Cooperative Apex Bank-te hnenah refinancing angin cheng vbc. 115 an pûktir a, chumi hun chhungah tho chuan Mizoram sorkar hnenah RIDF hnuaiah cheng vbc. 311 an pûktir tawh a ni.

Gutkha khap
Kolasib DC chuan thupek chhuahin, tunlaiin an district-ah Gutkha product lei leh hralh a hluar tih a tarlang a, "Hei hian naupang zawkte leh tleirawl rualte hriselna a tichhia a, harsatna nasa tak a thlen mek a ni. Khawtlang nun a him a, a hrisel zawk theih nan Gutkha aṭanga siam chi reng reng zawrh, lei leh ei khap a ni," a ti. Thupek hian ni 60 chhung a huam ang.

Vawk hri lênna Hmunah puang
Champhai Senior Veterinary Officer chuan Leisenzo, Champhai district-ah vawk eng emaw zat thite thih chhan chu African Swine Fever a ni tih finfiah a nih avangin, June 27, 2022 aṭanga thu leh awm hma chu ASF lênna hmun, infected area-ah Champhai district-a khua leh veng 29 a puang.

Deputy CM hmu
Aizawl North College Alumni Association leh Students' Union hruaitute chuan nimin khan deputy chief minister Tawnluia chu a inah an hmu a, ANC building chungchang leh an harsatna tawhte an thlen. Tawnluia chuan, ANC-in zirlaite lenna khawp classroom an neih loh chungchangah, a theih ang anga ngaihtuahpui a tum thu a lo hrilh.