Silchar ṭanpuina pêk mek zel a ni

Silchar leh a chhehvela tuilian rapthlak tak tuarte chhawmdawlna atan Mizoram sorkar chuan ṭanpuina a pe ṭan tawh a, Mizoram Synod pawhin Rs 8,00,000 pek a rél. YMA leh páwl ṭhenkhatte'n ṭanpuina an pe tawh bawk.

Chief minister Zoramthanga chuan June 26, Pathianni khan telephone hmangin Assam chief minister Himanta Biswa Sarma biain, tuilian vanga harsatna an tawh chungchang leh ṭanpuina pek theih dan tur a sawipui a, Mizoramin Assam-a tuilian tuarte puih a inhuam thu a hrilh.

CM Zoramthanga chuan tuizém lianah tui thianghlim lirtheia thawn thlak a, Vairengte aṭanga a remchan dan anga inpek Mizoramin a inhuam thu Assam CM a hrilh a; Himanta Biswa Sarma chuan lawmawm a tih thu sawiin, Cachar DC a lo biak tur thu leh a ṭul anga ruahmanna siampui tur leh lo dawngsawng tura a hrilh tur thu a sawi.

Sorkar thuchhuah tarlan danin, Mizoram sorkarin Silchar tuilian tuarte a ṭanpuina tur hi Police, PHE leh Disaster Management & Rehabilitation department te, Kolasib DC leh Vairengte SDO (Civil)-te chuan an bawhzui nghal.

June 26, Pathianni khan PHE department chuan pick-up pahnih leh 407 truck pakhat hmangin Silchar Mizoram House-ah tui thianghlim an dah a; nimin khan DMR department hmalaknain medium tanker panga leh HMV tanker pakhat hmangin Aizawl aṭangin tui phurh thlak a nih bakah, 1st IR Police tanker lian pakhat kaltir a ni. Tui phur lirtheite hian Vairengtea PHE tui cháwiin Silchar-ah an dah ṭhin dawn a ni.

Mizoram Presbyterian Kohhrana Synod Officers Meeting nimina ṭhukhawm chuan Silchar leh a chhehvel tuilian tuarte chhawmdawlna atan Rs 8,00,000 pek an rêl a; June 29, Nilainiah Cachar DC hnenah hlan ni se, an ti a, hlân turin Synod moderator Rev.Dr Vanlalnghaka leh secretary Rev. ZD Lalhmachhuana te an ruat.

YMA, Kolasib Sub-Headquarters chuan Silchar tuilian tuar mekte ṭanpui nan nimin khan Silchar Branch YMA leh Cachar DC hnenah Rs 50,000 ve ve an hlân a, Central YMA chuan Aizawla YMA branch hrang hrangte bakah, páwl dangte leh mimal ṭhahnemngaite thawh khawm tui thianghlim litre 15,000 chu June 26, Pathianni khan an thawn thla tawh.

Mizoram Oil Tanker's Driver's Association chuan June 26, 2022 khan tui thianghlim báwm 80 an thawn a, Silchar Branch YMA hnenah an hlân. Kolasib-a PHE department pawhin nimin khan tui tam tham tak an thawn bawk.

Aizawl FC chuan an tui phur lirthei pakhat chu Silchar leh a chhehvela mipui tana tui thianghlim chàwisak turin an thawh a, CYMA leh Vairengte Joint YMA ruahman angin Vairengte aṭangin tui phur thla ṭhin tura ruahman a ni.