MADC-te'n an mamawh Larsapah an thlen

Mara Autonomous District Council (MADC) deputy chief executive member HC Lalmalsawma Zasai leh executive member S Lalremthanga te chuan nimin khan Raj Bhanvan-ah Governor Hari Babu Kambhampati an hmu a, MADC harsatna leh mamawhte an thlen.

MADC hotute chuan, Indian Constitution-in Sixth Schedule hnuaiah district council a din thu sawiin, "Kan hlawh leh kan management zawng zawng hi keimahni inruahman ve tur a ni. Chutiang chu bill-ah siamin, MADC session-ah kan pass ṭhin. Bill kan pass tawh, Governor assent (pawmpuina) hmu si lo, thawn lêt si loh, a awmna chin hriat loh kan nei nual tawh," an ti.

Sixth Schedule-in a phal angin MDC salary bill leh staff salary bill, VC thar siam leh an bill hrang hrangte chu session-a an siam a, an pass ngai a nih thu tarlangin MADC hotute chuan, "Chu chu Governor assent tura thawn ṭhin a ni," an ti a; nikum budget session-a bill an pawm tawhte chu tun thlengin Governor aṭangin chhanna an la hmuh loh thu an sawi.

Larsap chuan, Sixth Schedule-in thuneihna a pek ṭha taka an hman a duhsak thu MADC hotute hi a hrilh a, "Hna thar lakah rilru séng ula, development lamah mipui tan theihtawp in chhuah a ngai. Harsatna in neih apiang lehkha hmangin min rawn hrilh ang a, ka theih ang angin ka lo pui zel ang che u," a ti.