AR sipaite'n ruihhlo leh kuhva an man

Assam Rifles sipaite chuan June 26, Pathianni khan Myanmar beer Dagon bûr 768 an man a, June 25, 2022 khan Myanmar aṭanga lak luh kuhva rah ip 80 an man bawk.

8th Assam Rifles chuan nimin khan Zote leh Champhai inkarah mi pathum hnen aṭangin Dagon beer bûr 768 an man a, Rs 1,53,600 man a ni a, Champhaia Excise & Narcotics department hnenah an hlân.

2nd Assam Rifles sipaite chuan June 25, 2022 khan Hnahlânah Myanmar lam aṭanga lak luh kuhva rah ip 80 leh a phurtu truck an man. Kuhva rahte chu Rs 32,96,000 man a ni a, Champhaia Customs department hnenah an hlân a ni.

June 25 vêk khan 8th Assam Rifles chuan Zokhawtharah ram dang zu Soju ûm 99, Dagon beer bûr 48 leh ABC beer bûr 24 an man bawk a; a vaiin Rs 54,000 hû a ni. Zu leh beer an mante chu Champhaia Excise & Narcotics hnenah an hlân.

June 24, 2022 khan 8th AR vêkin Zokhawtharah mi pathum hnen aṭangin methamphetamine mûm 51,000, Rs 1,02,00,000 hu an man bawk.

Assam Rifles-te chuan nimin khan Siaha district-a Laki khuaah ruihhlo ṭhat lohzia inzirtirna, Anti Drug Awareness an buatsaih a, tualchhung mi 50 vel an tel. Nimin vêk khan Zokhawtharah Nasha Mukt Bharat Abhiyan hnuaiah ruihhlo hman sual chungchang inzirtirna, Awareness Lecture on Drug Abuse an buatsaih bawk a; June 25, 2022 khan Aizawl, Zokhawsang, New Vaikhawtlang, Hnahlan, Mimbung, Kawlbem leh Ngopaahte International Day of Drug Abuse and Illicit Trafficking pualin hun an hmang bawk a ni.