Champhaiah ruihhlo leh a kaihhnawih inzirtirna buatsaih

International Day Against Drug Abuse and Illicit Trafficking pualin nimin khan Champai district Nasha Mukt Bharat Abhiyaan (NMBA) leh District Narco Coordination Centre Committee-te chuan Champhai College multipurpose hall-ah zirlaite tan ruihhlo leh a kaihhnawih chungchang inzirtirna an buatsaih a, DC James Lalrinchhana'n a hmanpui.

James Lalrinchhana chuan, zirna chu ruihhlo leh a kaihhnawihte donaa hmanraw pawimawh berte zinga mi a nih thu sawiin, ruihhlo laka inthiar fihlim tur leh tum mumal tak neia thil chîk nachang hre turin zirlaite a fuih.

Inkhawm zawhah Drug Awareness Rally neih a ni a, Champhai College multipurpose hall aṭanga college main gate thleng zirlaite'n ruihhlo leh a kaihhnawih laka fihlim tura inzirtir nan kawng an zawh.

Chawhnuah Champhai khawpuia zirna-in ṭhenkhatah ruihhlo chungchang inzirtirna an buatsaih bawk a, thupui chu 'Ruihhlo vanga hriselna leh nun tluchhe mek hmachhawn dan' tih a ni.