Covid-19 vanga thi mi pakhat awm belh

June 26, Pathianni khan Mizoramah swab sample 71 endik aṭangin Covid-19 vei mi pakua hmuh chhuah a ni a, positivity rate 12.68% a ni. Nimin khan hripui vei dam tawh mi 23 chhuahtir an ni a, Covid-190 vangin mi pakhat a thi.

Pathiannia hripui vei hmuh tharte chu mipa panga leh hmeichhia pali an ni a, RAT hmanga hmuh chhuah vek niin, endikna dang hmangin swab sample endik a ni lo.

Hripui vei enkawl lai Remruatfela (17), Phuaibuang chu nimin chhun dar 12:35 khan State Referral Hospital-ah a thi. Covid-19 positive a ni tih nimin vek khan hmuh chhuah a ni a, hripui vanga Mizorama thi 703-na a ni.

IDSP record angin, Mizoramah Covid-19 vei 2,28,904 hmuh chhuah a ni tawh a, mipa 1,06,567 leh hmeichhia 1,22,337 an ni a, mipa aiin hmeichhia 15,770-in an tam zawk. Nimin tlai dar 5 thleng khan mi 2,28,054 (99.63%) chhuahtir an ni tawh a, mi 703 (0.31%) thi tawhin, enkawl mek mi 147 (0.06%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pathum - Siaha, Champhai leh Lawngtlai district-te a awm a; positive active case tamna ber Aizawl district-ah mi 79 an awm mek a, Serchhip district-ah mi 29 an awm mek bawk.