Covid-19 vei hmuh mi 145 zinga A zatve aia tamin an vei tawh lo
Mizorama Covid-19 hripui vei zingah endik nawn lehnaa vei tawh lo (negative) an hmuh belh zel a, enkawlna hmun aṭanga chhuak pawh an pung zel. Hripui vei hmuh mi 145 zinga mi 74 chuan an vei tawh lo tih finfiah a ni tawh a, chu chu 51.03% a ni.
Zoram Medical College (ZMC) Covid-19 Laboratory-ah June 24, Nilaini khan mi 1,157-te swab sample endik a ni a, hripui vei hmuh chhuah thar an awm lo. Nimin khan mi eng emaw zatte swab sample endik leh a ni a, vawiin zingah result a chhuak ang.
June 24, Nilainia district hrang hranga mite endik dan chu - Aizawl mi 809 (M-362, H-447), Lunglei mi panga (M-4, H-1), Siaha mi 26 (M-11, H-15), Kolasib mi 49 (M-28, H-21), Serchhip mi pali (M-3, H-1), Lawngtlai mi 92 (M-69, H-23), Mamit mi 106 (M-62, H-44), Khawzawl mi 39 (M-12, H-27), RHF-ZMC mi 25 (M-5, H-20) a ni a; West Bengal mi leh Bihar mi pakhat ve ve an tel bawk.
June 24-a endik zingah hian Covid-19 vei vanga enkawlna hmuna awm mek zinga mi, hripui vei tawh lo tih hmuh chhuah an awm nual. Covid-19 vei tawh lo hmuh chhuahte zinga pariat chu Lawngtlai district mi, Lawngtlaia Covid Care Centre (CCC) - Health department complex-a awm mek niin, mipa paruk leh hmeichhia pahnih an ni a; pathum chu Kolasib district mi, State Referral Hospital (SRH)-a enkawl an ni.
Lawngtlai district mi Covid-19 vei tawh lo hmuh chhuah tharte hian vawiinah CCC an chhuahsan dawn thu district bawrhsap Andrew H Vanlaldika chuan zawhna chhangin Vanglaini a hrilh a; an swab sample lâk nawnna aṭangin ni nga a liam tawh avangin chhuahtir theih an nih thu sorkar thuchhuahin a tarlang bawk.
SRH-a enkawl zinga Aizawl district mi pahnih leh Kolasib district mi pathum, hmeichhia vekte chuan hripui an vei tawh loh avangin nimin khan damdawi-in an chhuahsan. Khawzawl district nula pakhat, June 21-a Covid-19 vei tawh lo tih finfiah tawh pawh nimin khan Dedicated Covid Health Centre (DCHC) aṭangin chhuahtir a ni bawk. Chhuahtirte hi ni sarih chhung an ina inkhung rih tura tih an ni.
Nimin tlai thleng khan Mizorama Covid-19 vei hmuh chhuah tawh zawng zawng chu mi 145 an ni a, chu'ng zinga mi 74 chuan an vei tawh lo tih finfiah a ni tawh a, mi 71-in an la vei mek. Hripui vei tawh lo mi 74 zinga mi 30 chu ZMC/CCC/DCHC aṭangin an chhuak tawh a, mi 44-te an la chhuak rih lo.