Martarte Lungphunah pangpar dah

Mizoram Pradesh Youth Congress Committee (MPYCC) chuan CTI Se­sawnga Martarte Lungphun an siam kum 25-na, silver jubi­lee pualin hun an hmang a, martarte hriatreng nan pangpar an dah a, MPYCC treasurer Zodintluanga Ralte-in a hmanpui.

MPYCC president hlui Zodintluanga Ralte chuan, Mizoram a buai laia ṭah leh haṭhialna avangin mipui an rûm tih sawiin, "Congress party zarah remna leh muanna kan nei. Kan sawi duhte sawi ngam kan nih tâkah chuan ram tana nunna chán tate ngaihthah an ni kha MPYCC rilru a na em em a, MNF sorkar, a ti tur bera kan ngaihin an sorkar lai pawha an ngaihsak loh avangin Martarte Lungphun hi kan tih turah ngaiin kan ti ta a ni," a ti.

Zodintluanga Ralte chuan, "Aizawl tlâk lamah mipui aṭanga nawrna nasa tak karah thinlung tak taka tih ni loin MNF-te'n martarte thlân an siam ve leh hnuhnawh a ni," a ti a; MNF-in martarte an ngaihthah rei hle niin a sawi.

MPYCC tarlan danin, Martarte Lungphun hi Mizo­ram rambuai kum 1966-86 chhunga Mizo thite puala lungphun siam hmasak ber a ni a, June 27, 1997-ah a hun laia chief minister Lal Thanhawla'n a hawng. Lungphunah hian hming 1,168 a chuang tawh.

Martarte Lungphun silver jubilee puala hun hmanah hian martarte hriatreng nan pangpar an dah a; MPYCC president ni lai Dr Lalmalsawma Nghaka pawhin thu a sawi.