Champhai an lungawi lo chhunzawm ; Doctor 26 a rang lama lâk tum a ni - HM
Champhai District Hospital-a doctor dah belh phûtna kal zelah nimin khan Champhai mipuite'n Circuit House-a bungrua ṭhenkhat an tichhia. Hetih lai hian, Home minister R Lalzirliana chuan, Mizoram sorkarah doctor indaih lohna a nasat avangin a rang lamin doctor 26 lak tum a ni a, a hmanhmawhthlak avangin written test nei loin, personal interview-a lak a ni ang tih a sawi.
MZP headquarters, Champhai chuan Champhai District Hospital-a doctor dah belh tura sorkar kar nan nimin khan sorkar pisa leh zirna-inte an khâr leh a; MZP-te bakah, MZP-a tel lo mi eng emaw zat an thawk chhuak. Champhaia sorkar pisate leh zirna-inahte kai an awm lo.
Nimin chawhnu khan Champhai Vengthlang kawtthlerah mi ṭhahnem tak an pungkhawm a; Champhai Police Station awmna Vengsang panin kawng an zawh. Chumi hnuah mi eng emaw zat chuan Circuit House an pan a, Circuit House chu páwn lam aṭangin lung leh leirawhchana an vawm bakah, in chhung bungrua eng emaw zat an tichhia a ni.
Circuit House bungruate tihchhiat a nih hnuah tlawmngai pawl hrang hrang hruaitute leh political party hruaitute chu Kahrawt Veng YMA Hall-ah an ṭhu khawm. Champhai District Hospital-a doctor dah belh tura sorkar an ngenna chu chawlhkar leh chhung ngeia tihhlawhtlin an phût a; zirlai hliamte zangna dawmna pek te, Champhai district chhunga MLA pangate chu mipui ngaihsak loa an hriat avangin báng vek tura an phût thute an tarlang.
Doctor lak thar tur chungchangah hian nimin khan Home minister R Lalzirliana hoin a pisaah Health minister Lal Thanzara, parliamentary secretary (Finance) KS Thanga, Finance secretary Lalmalsawma, Health secretary Lalrinliana Fanai te bakah, DPAR leh MPSC hotute an ṭhukhawm a ni.
Meeting-ah hian, Health department chu a rang thei ang berin doctor lak turah chawlhkar lehah MPSC-ah lut hman turin ruahmanna siam nghal tura tih a ni.
Home Minister chuan, doctor an lak turte chu mamawh zualna - Champhai, Mamit, Kolasib, Siaha, Lawngtlai, Tlabung leh Chawngte-ahte dah tum a nih thu a sawi a; damdawi-in dangahte pawh an mamawh dan azirin dah a nih tur thu a sawi bawk.
Health minister Lal Thanzara chuan, Assembly budget session neih zawh takah, doctor indaih lohna a nasat êm avangin doctor 26 lak an nih tur thu a lo sawi tawh a ni.
Meeting-ah hian, doctor lakna turin DPAR-in an pawm tawh thu te, hun rei lo tê-ah MPSC-in advertisement a chhuah theih beisei a nih thute sawi a ni. R Lalzirliana chuan, Champhai MZP-te chu doctor lak belh hun lo nghâk hram turin a ngen a; doctor 26 lak fel a nih hunah a remchan dan anga pek an nih tur thu a sawi.
April 20, 2017 tlaia Champhai MZP-te'n doctor pek an ngiatnaa buaina chhuak chungchangah Home Minister chuan, "Doctor mamawh vanga zirlaite'n sorkar an nawr a, tharum thawhna thleng kha a pawi hle. Buaina a chhuah tawh hnu chuan ṭha taka inbiak a har ṭhin a, mahse, zirlaite an inhnuh hniam theih avangin a lawmawm hle a ni," a ti a; boruak sosang a awm loh nan leh doctor mamawh la turin a kaihhnawih department-te nena ṭhukhawm an nih thu a sawi bawk.
April 20, 2017-a MZP duty nia hriatte'n Champhai DC Complex-a lirthei panga an hâl avangin nimin khan Champhai DC Complex leh a chhehvelah Champhai District Magistrate-in CrPC Section 144 hmangin mi panga aia tam punkhawm khapna thupek a chhuah.
Home Minister-in nimina Congress Bavan-a a sawi danin, Champhai DC Complex-ah hian 2nd. IR battalion ṭhahnem tak, commandent hoin dah a ni a, police DIG-in Champhai a ṭhutchilh tawh a, Police pawh thahnem tak thawn chhoh an ni.
Home Minister chuan, Champhaia mi pawimawhte leh tlawmngai pawl hruaitute biak an nih thu sawiin, boruak duhawm lo a thlenzui tawh loh a beisei thu a sawi.