Salvation Army-in centenary lawm dawn

Salvation Army (SA) India Eastern Territory (IET) chuan April 26, 2017 hian kum 100 a tling dawn a, an centenary hi April 25-30, 2017 chhung hian R Dengṭhuama Indoor Stadium-ah an lawm dawn a, mi zawng zawng tel turin an sáwm.

SA IET centenary lawm tur chungchangah hian SA IET territorial commander Com. Lal­ngaihawmi leh hruaitu dangte'n Aizawl Press Club-ah press conference an nei a; centenary an lawm tur chu 'Hnehna Ropui' tih hming an vuah thu sawiin, "Kawng hrang hrangin Pathian fak leh chawimawinate leh Pathian hnena lawmthu sawina hun hlimawm tak neih tum a ni," an ti.

An sawi danin, SA IET centenary lawmna hi SA hruaitu lu ber Gen. Andre Cox leh a nupui Com. Silvia Cox, Women Ministry-a world president-te leh khawvel ram danga hruaitute'n an hmanpui dawn a ni.

Centenary lawmnaah hian naupang pual, ṭhalai pual, hmeichhe pual, officer pual leh vantlang inkhawmte buatsaih a ni dawn a; April 29 chawhnua corps cadet puala in­khawmah corps cadet (Pathian thu kum 6 chhung zir) mi 446 hnenah badge of merit hlan a ni ang a, April 28-ah Temple Square-a Centennial Family Store hawn a ni ang.

Salvation Army hi Mizoramah chuan April 26, 1917-ah din a ni a, kum 2016 statistics ang chuan member 60,799, corps 238, society 146, outpost 19 leh social institution 15 an nei mek. SA India Eastern Territory hian Mizoram bakah, Assam, Manipur, Meghalaya, Tripura, Na­galand, Arunachal Pra-desh, Sikkim, West Ben-gal, Nepal leh Bhutan-ahte rawngbawlna an kalpui mek a ni.