Ni hnih awh tur Edu Fest 2017 ṭan a ni

Lynchpin leh Zalen chanchinbu buatsaih, Edu Fest 2017 chu nimin khan Millennium Centre chung záwl ṭan a ni a, Higher & Technical Education secretary Benjamina'n a hawng. Edu Fest hi vawiinah chhunzawma zawh a ni ang.

Benjamina chuan, Mizoram chu a awmna a kilkhâwr vang leh tlawh­pawhna a ṭhat loh avangin state dangte a tluk lo tih a sawi a, "Hmun dangte thil tih hre tur leh hmasawn tur chuan tlawhpawh a, zirna-in ṭhate an rawn inphochhuah a ngai," a ti.

Benjamina chuan, Mizoramah college eng emaw zat awm mah se, an hnen aṭanga zir chhuakte'n hna an hmu ṭha tâwk loa a hriat thu sawiin, ṭan lak lehzual a pawimawh thu a sawi a; Edu Fest-a inlan zirna-inte chu zirlaite zir tur dik tak kawhhmuhtu, hmantlaka Mizo zirlaite siamtu ni thei se a duh thu leh, zirlaite tan an hma lam hun ngaihtuah chunga an kalna tur dik tak an thlan thiam pawimawh a tih thu a sawi bawk.

Edu Fest Zalen editor Vanlalrema Vantawl chuan, Mizo zirlaite'n zirna in ṭha, mahni kawtkai ngeia an dàwr theihna atan Edu Fest chu buatsaih ṭhin thu a sawi a; tun ṭum Edu Fest-ah hian UGC leh AICTE accredited institution-te an lo kal tih a sawi a ni.

Edu Fest hi a ṭum 15-na a ni a, medical, engi­neering, business leh hotel manegement lam zirna inte telin, zing dar 11 aṭanga tlai dar 5 inkarah tlawh theih a ni. Edu Fest tlawh­tute tan quiz leh lucky draw a awm ṭhin a, a chháng dikte hnenah smart­phone, powerbank, selfie stick-te man theih a ni.