IMA-in quarantine vil an titâwp Task force ṭawiawm turin an inngen

Indian Medical Association (IMA), Mizoram Branch chuan community quarantine facility (CQF) an vil ṭhin chu nimin aṭang khan an titàwp a; chutih rualin, an member-te chu an awmna veng ṭheuhah a theih angin local task force (LTF)-te ṭawiawm turin an chah.

Mizoram IMA chuan, Covid-19 Medical Operational Team leh Aizawl East leh West chief medical officer-te'n an ngen angin AMC huam chhunga CQF vil hna an thawk a; team 58-ah insiamin, an member doctor 461 chuan June 3, 2020 aṭang khan CQF 220 an vil a ni.

Hriattirna an tihchhuahah IMA chuan, team zawng zawngin CQF hneh taka an vil thu tarlangin, "Kan senior doctor aṭanga junior zawk thlengin thawhhona boruak ṭha em em nen hma kan la a ni. Mahni hun leh thâ, sum leh pai séngsoin, phût lêt nei miah loa hma kan la hi a lawmawm tak zet. Medical community-te kan ram venghim tura kan inpekna hi a hrethiam apiangin min ngaihhlutsak a, IMA a tihmingṭhain, mipuiin medical community-ah rinna an nghah phah em em a ni," an ti.

Tunah chuan CQF-a awm tam zawk chu an in lamah an haw tawh thu sawiin IMA chuan, "State páwn aṭanga lo luh belh tur pawh sorkar quarantine facility-in a dâwl zo tawh turin hotu lamte'n an beisei. Chuvangin, IMA hmalakna anga CQF vil hna chu chawlhsan rih tawh ni se tiin thutlukna siam a ni. June 24 khan MOT chairman Dr ZR Thiamsanga hnenah hriattirna pek a ni," an ti a; hriattirna an pek angin, nimin (June 25) aṭangin CQF vil hna an tihtawp thu an tarlang.

IMA, Mizoram Branch chuan, an member-te chu an awmna veng ṭheuhah a theih ang anga local task force-te ṭawiawm turin an ngen a, "Medical community kan nihna anga kan mawhphurhna pawimawh tak a ni reng. I inhawng chhunzawm zel ang u," an ti.