KHAWTHLIR

CM VIP light hlîp
Chief minister Lal Thanhawla chuan, sorkar laipuiin VIP-te an car chunga VIP light (beacon light) hlih an tih chu a pawm zawng tak a nih thu a sawi. Hei vang hian, Chief Minister car-a VIP light chu April 20, 2017 khan hlih nghal a ni.

Bial inkhawmpui
Presbyterian Kohhrana pastor bial hrang hrangte chuan nizan khan Bial Inkhawmpui an hmang ṭan a, Pathianni zanah a ṭiak ang. Inkhawmpuiah hian nizan khan bial chhunga tualchhung kohhrante report ngaihthlak a ni a, vawiinah rorel inkhawm neih a ni ang a, naktukah Lalpa Zanriah Sakramen an changho dawn a ni.

Legal volunteer Pualin training
Mamit District Legal Services Authority (MDLSA) chuan nimin khan Mamit District Court-ah para legal volunteer-te pualin training an buatsaih a, MDLSA secretary kal chhuak tur Julie Lalrinzami'n a kaihruai. MDLSA secretary thar tur Gracy L Bawitlung, Mamit chief judicial magistrate tharin legal volunteer-te chu thawhpuiah sawmin, dan hriatna lamah mipuite hmasawn nana ṭhahnemngai taka thawk turin a fuih.

Civil Service Day
Nimin khan Mamit DC Conference Hall-ah Civil Service Day vawi 11-na hman a ni a, Mamit bawrhsap Lalbiaksangi'n a hmanpui. Lalbiaksangi chuan, sorkar hnathawkte chu ram hmasawnna tura theihtawp chhuah turin a sáwm a; ram leh khawtlang tana tih dan ṭha zawk leh ruahmanna nei tura ngaihtuahna séng turin a chah a ni.

'Favang' tlangzarh
Mizo film thar, ‘Favang' tih chu nimin khan IPR directorate auditorium-ah IPR director Lalnithangi'n a tlangzarh. Lalnithangi chuan, Mizoramah theatre a awm lo tih sawiin, IPR department in ‘Lianchhiari Rûn’ a sak hunah chuan veng hrang hranga projector pu kuala film show ṭhinte a tihbo ngei a rin thu a sawi.