Kum 2016-17 Siaha district IMR 32

Nimin khan Siaha DC Conference Hall-ah district bawrhsap Harleen Kaur hoin Reproductive Maternal Newborn Child+ Adolescent Health (RMNCH+A) chungchang thlirletna hun hman a ni a; kum 2016-17 chhunga Siaha district-a nausen thihna, infant mortality rate (IMR) chu 32 (nau piang 1,000 zelah 32 an thi tihna) a nih thu tarlan a ni.

Meeting-ah hian Siahaa head of department te, Health department-a hotu te, National Health Mission (NHM) hotute leh UNICEF aiawhte an tel a; Mizoram state RMNCH+A consultant UNICEF hotute an tel bawk.

Meeting-a tarlan danin, April 2016 - March 2017 chhungin Siaha district-ah nausen 42 an thi a, chungte chu mipa 18 leh hmeichhia 24 an ni a; nu nau chunga thi mi pali an awm.

Siaha district-ah hian mihring 62,021 an cheng a, birth rate chu 23 a ni. District hospital pakhat, damdawi-in dang (PHC) pali, Health sub-centre 24 leh clinic 12 a awm a; Siaha District Hospital-ah medical officer (doctor) 10 leh specialist doctor pali, district chhungah medical officer (RBSK) pali (dental surgeon pahnih leh Ayush doctor pahnih) an awm.

Siaha district chhungah doctor awmna PHC pali a awm a, sorkara thawk health worker 55 (mipa 19 leh hmeichhia 36), health supervisor 9, staff nurse 38 (District Hospital-ah 29 leh PHC pali-ah 9), ASHA 76 an awm a; nau neih theihna sub-centres 11, health worker awm lohna sub-centre pakhat a awm bawk.

2011-17 Siaha IMR

Kum IMR

2011-12 81.4

2012-13 87.3

2013-14 94

2014-15 116

2015-16 38

2016-17 32