Champhaiah Addl. District & Sessions Court

Champhai Zote-a Champhai Additional District & Sessions Judge Court chu nimin khan Gauahati High Court Chief Justice Justice Ajit Singh leh Law & Judicial minister Lalsawta ten an hawng.

Justice Ajit Singh chuan, Champhai chu kawng hrang hranga district pawimawh a nih thu sawiin, insumdawn tawnna hmun a nih avangin ruihhlo tawlhrûkna leh sualna hrang hrang a punlun zel nia a lan thu a sawi a; dan leh thupek kenkawh kawngah awlsawm zawka Court rorelna neih a nih theihna turin Additional District & Sessions Judge Court chu Champhaiah ruhman a nih thu a sawi a ni.

Chief Justice chuan, Champhai Addl District & Sessions judge turin R Vanlal­vena ruat a nih tawh thu a sawi bawk.

Law & Judicial Minister pawhin thu sawiin, Sessions Judge Court nei thei tura Champhai leh Zote mipuite inpekna fakawm a tih thu a sawi a; Court chu misual hremna lam chauh ni loin, dikna hai lan bakah, sual a tlem theihna tura rorelna in pawimawh tak a nih thu a sawi a ni.

Additional District & Sessions Judge Court hi Mizoram sorkarin cheng nuai 33.21 sênga a siam a ni a; building pali awm sa chei ṭhaa a siam a ni. Court hawnnaah hian hleilenna leh pawi khawihna tuartu mi 10 hnenah zangna­dawmna hlan a ni bawk.

Court hawnnaah hian Gauhati High Court judge Justice Michael Zothankhum­a pawh a tel a ni.