MADC inthlana chak tum loah MNF puh
Minister Zodintluanga, Congress Legislature Party (CLP) treasurer ni bawk chuan, Mara Autonomous District Council (MADC) inthlan turah MNF-te chuan chak tum lo sain hma an la a, chutih laiin, Congress party chuan sorkar leh tur chiang sain inthlan an hmachhawn dawn niin a sawi.
Zodintluanga hian nimin khan Siaha-a Congress Bhavan-ah thu sawiin, kum danga inthlan aiin tun ṭuma MADC inthlan tur chu Congress party hruaitute leh Congress MDC ni mekte vangin a hahdamthlak niin a sawi a, "MNF hian inthlanah hian chak an tum lo. Party headquarters aṭangin an lo kal a, candidate an puang a, press release an siamah Mara mipui an ngaih pawimawh lohzia a lang," a ti.
Congress sorkarin Siaha district-ah hmasawnna tam tak a dah mek nia sawiin Zodintluanga chuan, damdawi-in te, Greater Siaha Water Supply Scheme-te tihpuitlin mek a nih thu a sawi a; Siaha mipui leh ṭhalaite ṭawiawmna an hmuh ṭhat chuan Mizoram sorkara a department chan aṭang-in kum khat chhungin Siahaa khelmualah phùl lem phah a nih tur thu a sawi bawk.
Minister PC Lalthanliana pawhin thu sawiin, kum 2018 MLA inthlanpui awm turah MNF chu under 5-ah an awm dawn niin a sawi a, "MNF President khan Congress chu kum 2018 inthlanah under-10 ah an awm ang, a ti a. Anni MLA panga neiin under 10-ah dah min tum a nih chuan, keini MLA 34 nei chuan MNF hi under 5-ah kan dah dawn a ni," a ti.
Nimina Siaha Congress Bhavan-a inkhawmah hian Siaha ZNP chuan MADC inthlan awm turah Congress party an thlàwp thu an puang a ni.