Education Minister-in MBSE a chhuang

School Education minister Lalchhandama Ralte chuan, Higher Secondary School Leaving Certificate (HSSLC) leh High School Leaving Certificate (HSLC) result rang taka an tih chhuah avangin Mizoram Board of School Education (MBSE) chu chhuanawm a tih thu Vanglaini a hrilh.

Lalchhandama Ralte chuan, Covid-19 vangin HSSLC exam a khaihlak reng tih sawiin, "July 3-ah exam zawh theih chauh a ni. MBSE lam an thawkrim em em a, hun rei lo tê chhungin result an peih thei a ni. MBSE-a thawktute inpekna leh thawhrimnate a chhuanawm hle," a ti.

Result tihchhuah an hmanhmawh chhan sawiin Minister chuan, "Central Board of School Education leh Indian Certificate of Secondary Education lamin tun hnaiah result an tichhuak a, anni'n result an tih chhuah tawh chuan hma lam hun hriat ni lo mah se, lo inbuatsaih ve a ngai a ni," a ti a; result a chhuah har chuan zirlaite'n admission-ah harsatna an tawh theih thu a sawi.

School Education Minister chuan, HSSLC Examination leh HSLC compartmental exam-a pass zawng zawngte lawmpuiin, an zir zelna turah duhsakna a hlàn a, "Hlawhtlinna chang ta lote ka tawrhpui a, beidawng mai loa theihtawp chhuah zui zel turin ka chah a ni," a ti.