Congress party-in Barkha Sukhla Singh hnawtchhuak

Congress Party chuan Delhi Congress women’s wing hruaitu Barkha Shukla Singh chu party duh lo danah a chet avangin kum ruk chhung atan an hnawtchhuak. Hemi hma hian Congress hruiatu Arvinder Lovely chuan Congress hi chhuahsanin BJP a lo zawm tawh bawk.

Delhi Congress hotu Barkha Shukla Singh-i hian an party vice president Rahul Gandhi chu party hruaitu ni turin a rilruin a phak lo niin a lo sawi tawh a, Gandhi chuan an harsatna neih mekte a ngaihven pui lo niin a sawi. Rahul Gandhi chu biru tlat nia sawiin, ama party member ngeite pawh a hmu ngam lo niin a sawi.

Congress party chuan MDC inthlan neih dawna Singh-i’n party duh lo zawnga thil a tih avangin displinary committee chuan hrem a rel ta niin a sawi.

Singh-i hian Rahul Gandhi bakah Delhi Congress chief Ajay Maken pawh a lo bei tawh bawk a, Maken chu ama chungah chauh ni lo, Mahila Congress office bearer dangte lakah pawh mawi lo takin a che niin a sawi. An harsatna hi Rahul Gandhi hnenah an thlen chung pawhin ani chuan a lo ngaihsak duh lo a ni, a ti. Congress hruaitu dang eng emaw zat hnenah pawh a lungawi loh thu hi a sawi bawk.