Sumdawngte'n dawr hawn an duh Hma la turin sorkar an ngen
Sumdawng pawl hrang hrang 40 chuang hruaitu nimina ṭhukhawmte chuan, dawr hawntir phûta Mizoram Merchant Association (MIMA) hmalakna an thláwp a, sumdawngte'n dawr an hawn theih nan hma la turin Mizoram sorkar an ngen.
Sumdawng pawl hrang hrangte chuan, MIMA-in 'Mipuiin ṭàmpui mitthi kan tawrh loh nan sumdawngte'n kan eizawnna hmunah zalen taka hna kan thawh theih nan hma min laksak rawh se' an tih chu an thlàwp thu an tarlang a, "MIMA-in sumdawng a tihah hian lirtheia eizawng zawng zawng city bus leh taxi hmanga eizawngtute a huap vek a ni," an ti.
An ngenna a hlawhtlin theihna atan sumdawngte chuan theihtawpa hmalakho zel an rél a, an ngenna chungchangah sorkar ngaichângin, June 27, 2020 tlai dar 4-a ṭhukhawm leh turin thu an dah.
Vanglaini palai zawhna chhangin MIMA hruaitute chuan, Chief Secretary hnena dawr hawn an duh thu an thlen chungchangah he thu ziah lai thleng hian chhànna an la dawng lo. MIMA hian an ngenna hi June 24 chhûnah an thehlut a ni.
Tarlan tawh angin, MIMA chuan an duh dan hi June 27 thlenga tihhlawhtlin a nih loh chuan ni thum chhung (June 29 - July 1) dawr zawng zawng khâr an rél a; chu chuan awmzia a neih loh chuan tiamchin awm loa hmalak chhunzawm an tum a ni.