HSSLC 2020-ah zirlai 9,677 an pass

Mizoram Board School Education (MBSE) chuan nimin khan Higher Secondary School Leaving Certificate (HSSLC) Examination 2020 result a tichhuak a, zirlai exam 12,324 zinga 9,677 an pass a, pass percentage chu 78.52 a ni.

Kumin HSSLC Examination-ah hian exam hmachhawntu zirlai 12,324 awmin, regular student 12,114 leh private-a exam mi 210 an ni a; pass zawng zawng zirlai 9,677 zinga a tam zawk 5,174 chu hmeichhia niin, mi 4,416 chu mipa an ni. Regular-a exam zingah 9,590 (79.16%) pass in, private candidate 210 zinga 87 (41.43%) an pass.

Zirlai pass 9,677 zinga 431 chu distinction-ah an pass a; first division-ah 2,806, second division-ah 4,049 leh third division-ah 2,391 an pass. Compartmental chance nei zirlai 96 an awm a; fail zat chu zirlai 2,551 an ni.

Zirlai pass vekna sikul Arts-ah 29, Science-ah pakhat leh Commerce-ah pariat a awm. Chutih laiin, zirlai fail vekna sikul Science leh Commerce-ah pakhat ve ve a awm a, Arts-ah fail vekna sikul a awm lo. Compartmental chance neite tan MBSE chuan August 11, 2020-ah Aizawl, Lunglei leh Siahaah exam a buatsaih dawn a, July 28 thleng application form MBSE-ah thehluh theih a ni ang.

Arts stream bikah zirlai exam 9,470 zinga 7,377 (77.90%) an pass a, mi 2,016 fail-in, compartmental chance nei 77 an awm. Distinction-ah mi 258, first division-ah 1,750, second divi­sion-ah 3,092 leh third division-ah 2,277 an pass.

Science-ah zirlai exam 2,267 zinga 1,800 (79.40%) an pass a, zirlai 448 an fail. Distinction-ah mi 117, first division-ah 880, second division-ah 754, third division-ah 49 pass in, compartment chance nei mi 19 an awm.

Commerce-ah zirlai 587 zinga 500 (85.18%) an pass a, zirlai 87 an fail thung. Distinction-ah mi 55, first division-ah 175, second division-ah 202 leh third division-ah 68 an pass a ni. HSSLC Examinations 2020-ah hian Arts stream-ah sorkar sikulah 71.65%, deficit school-ah 86.72%, aided school-ah 82.98%, lumpsum school-ah 80.40% leh private school-ah 80.59% an pass a; private candidate zinga 41.27% an pass. Science-ah chuan sorkar sikulah 64.76%, deficit school-ah 86.07%, aided school-ah 53.33% leh private school-ah 83.95% an pass a; private candidate zinga 36.84% an pass a; Commerce-ah sorkar sikulah 66.08%, deficit school-ah 90.37%, private school-ah 95.15% pass in, private candidate pahnihte an pass ve ve a ni.