Sangha chi supply-na tura tender Chhangtu 2-in sangha dil an nei lo
Kum 2016-a Fisheries department-in NLUP hnuaia sangha chi (notê) supply tura tender chhangtu zinga farm pahnih chuan sangha dil an nei lo tih hriat chhuah a ni. Hetih lai hian thuneitute chuan, sangha note supply tur thlanna chu a felfai thawkhat niin an sawi.
RTI Act hmangin kum 2016-a NLUP hnuaia Fisheries department-in tender chhuaha sangha chi a supply tir dan a zawh a ni. Fisheries director BD Tyagi-in chhannaa a tarlan danin, February 2016-ah NLUP hnuaia sangha dil neitute hnena sem tur sangha chi supply tur zawn nan chanchinbu - Vanglaini, Zawlbûk, Youth Herald, Mizo Aw leh Zawlkhawpui-ahte quotation tihchhuah a ni.
Sangha note supply tur hian tehfung chi hrang hrang a awm a; sangha chi khawina/siamna, keutirna hmun nuai 10-100 siam chhuah theihna neih a ngai a, brodder tank/stocking tank, nursery pond leh sangha note dah sawnna (rearing pond)-te neih a ngai.
Tender chu mi 14-in chhángin, an zingah Silchar lam mi pawh a tel a; mi dangte chu Aizawl, Mamit, Kolasib leh Serchhip district-a mite an ni. Mi 14-te'n tender an chhanna chu tehfung hrang hrang hmanga teh hnuah farm pariatte tender chhanna pawm a ni.
Farm pariatte chhanna pawm a nih hnuah Fisheries department leh NLUP Implementing Board (NIB) official-te'n sangha chi supply tlâk an nih leh nih loh an enfiah a, still camera leh video camera-in thla lak zel a ni. A hmuna endik vek a nih hnuah farm pahnih - Buhchang Fish Seed Farm, Kolasib district leh Benson Fish Seed Farm, Kolasib district-te chuan sangha dil an nei lo tih hmuh chhuah a ni.
Farm pariatte hi enfiah leh an nih hnuah an report chu State Purchase Advisory Board-ah Chief Secretary hoin endik a ni a; SPAB chuan sangha chi supply turin Zofa Fish Seed farm, Chemphai, Zoram Fish Seed Production Centre, Chemphai leh Ephraim Fish Seed Farm, Mamit-te an thlang.
Farm pathumte hi district hrang hranga NLUP hnuaia sangha dil neitute hnenah sangha note supply tura tih an ni a, farm pathumte chuan sangha chi an supply vek tawh niin thuneitute chuan an sawi.
Sangha chi supply theia insawia tender chhangtute zingah, an sangha chi siamna/ sangha dil endik a nih hnuah sangha dil nei lote hnenah sangha chi supply tir a awm leh awm loh RTI Act hmanga zawhna chu Fisheries SPIO chuan, 'Awm lo' tiin a chhang a ni.
Tender chhannaa tling farm pariat
# Farm Hming A Neitu
1. Zofa Fish Seed Farm, Chemphai Lalṭhuamluaia Sailo
2. Zoram Fish Seed Production Centre, Chemphai Lalfela Chhangte
3. Ephraim Fish Seed Farm, Mamit Vanlalruata Pachuau
4. LV Fish Seed Farm, Mat valley K Lalthantluanga
5. Benson Seed Farm, Kolasib district Lalnunpuia
6. Buhchang Fish Seed Farm Lalzamliana, Dawrpui A
7. LV Fish Seed Production, Mat valley C Lalhmunsanga
8. CMS Farm Lalrinkima