MADC-a candidate-te symbol pe

May 4, 2017-a Mara Autonomous District Council (MADC) inthlan tura candidate mi 70-te chu April 22, 2017 khan Returning Officer-in an chhinchhiahna (symbol) tur a pe.

Indian National Congress (INC) candidate 25, MDF candidate 13, MNF candidate 12 leh BJP candidate parukte chuan an party symbol pangngai ṭheuh an hmang dawn a; INC-in kutphah, BJP-in lotus, MDF-in se lú leh MNF-in arsi an hmang ang. Independent candidate 14-te erawh chuan free symbol aṭangin duh an thlang a ni.

Returning officer Harleen Kaur, Siaha DC chuan candidate-te leh anmahni puitu tur election agent-te chu a ko khawm a, Mizoram State Election Commission-in inthlan atana dan a siamte hrilhfiahin, ṭha taka zâwm turin a ngen.

Siaha DC chuan, candidate tinin inthlanna atana sum an hman theih zat chu Rs. 20,00,000 a ni tih sawiin, candidate-te chu an sum hman dan ṭha taka chhinchhiah turin a chah a ni.