KHAWTHLIR

Thisen pe
Haulawng bial ṬKP-te chuan Inrinni khan Lunglei Civil Hospital tan thisen unit 88 an pe a, Lawngtlai East bial ṬKP pawhin Lawngtlai District Hospital tan thisen unit 26 an pe. Salvation Army Youth, Thingsulthliah bialte chuan Salvation Army India Eastern Territory centenary lawm nan Aizawl Civil Hospital tan thisen unit 29 an pe a, Aizawl Civil Hospital tan vêk Edenthar Veng branch YMA-in unit 16 leh Independent Church of India (ICI) KṬP-te'n KṬP Week pualin unit 21 an pe bawk.

Delh hlum
April 22, Inrinni chawhnu dar 1:30 vel khan Lunglawn, Lungleiah Lungrem chimin cement mitiri Raja Rai (32), Suresh Rai, Karimganj a delh hlum. Raja Rai hian Inrinni khan H Zohmingliana te êk-in khur tur an laih laiin a sira lungrem chimin a chhilh a, lak chhuah a nih chuan a lo thi hman tawh a ni.

Bial Inkhawmpui
Mizoram Presbyterian Kohhrana pastor bial hrang hrangte chuan April 21 zan aṭanga nimin thleng khan Bial Inkhawmpui an hmang. Bial Inkhawmpuiah hian Inrinni khan nilengin rorel inkhawm neih a ni a, nimin chawhnu khan Lalpa Zanriah Sakramen ṭheh a ni.

KNP Day hmang
Mizoram Baptist Kohhrana Kristian Naupang Pawl din champha, KNP Day vawi 74-na chu nimin khan lawm a ni. Kumina KNP Day thupui chu ‘Mi dangte khawngaihtu’ tih a ni a, KNP awmna BCM kohhran hrang hrangah hman a niin, intihhlimna hunte hman a ni.

HIV/AIDS inzirtir
ṬKP, Kolasib unit chuan nimin khan an Kohhran hall-ah HIV/AIDS awareness campaign an buatsaih. He hunah hian Kolasib DAPCU-a thawkte'n HIV/AIDS chungchang an sawi a, sawihona leh zawhna leh chhanna hun hman a ni.