Hunthar-ah in chim; chhungkua inthiar chhuak

Nikuma Hunthar Venga lei tlakhniamna chhaka Lal­rinawmi in, RCC building chu nimin chhun dar 11:30 vel khan a chim a, Lalrinawmi in chhaka B Sairengpuii in pawh a him tawh loa ngaih a ni.

Thu dawn danin, nikum lama Hunthar Venga lei tawlh­naah hian tun hnaia lei a che leh a, lei a tlak belh zel avang­in nimin khan Lalrinawmi in, chhâwng thu chu a chim a ni. 

In chim hian a thlanga NH-54 kawngpui ṭhenkhat a hnawh thla a, nimin khan Hunthar Veng khawtlang leh PWD lamin a remchan dan angin hnatlangin an senghawi nghal.

Lalrinawmi in chhak chiah­a awm B Sairengpuii pawh a him tawh lo niin Hunthar Veng khawtlang hruai­tute chuan an sawi. An sawi danin, B Sairengpuii in hi a hungna hnuai lamah tuiin a hawrh a, chu chuan in hungna a khawih che ṭan a ni.

B Sairengpuii te hian nimin khan ina an bungruate an thiar chhuak a, nizan lamah pawh inah an riak lo nia thu dawn a ni. B Sairengpuii in bakah hian, lei chetna bul hnaia awm chhungkaw10 vel an inthiar chhuak tel nia thu dawn a ni bawk.

Disaster Management & Rehabilitation director C Lalpeksanga chuan, B Sairengpuii in chu a chhunga teak thing tam tak awm chuan a tihrih dawn êm avangin thiar chhuah theih ang ang senghawi turin nimin khan a ngen thu Vanglaini a hrilh.