Champhaiah lungawi lohna lantir titawp rih

MZP headquarters, Champhai-in Champhai District Hospital-a doctor dah belh phûta April 18, 2017 aṭanga lungawi lohna an lantir chu an titawp rih a; Champhai khawpuiah khawsak phung a pangngai leh tawh.

Champhai aṭanga thu dawn danin, Champhaiah hian nunphung a pangngai leh tawh a, Inrinni aṭang khan sumdawnna hmun leh dawrte pawh hawn a ni leh tawh a; sorkar pisa leh zirna-inte pawh vawiin aṭangin dan pangngaia an inhawn theih beisei a ni.

Champhai District Hospital-a doctor leh hnathawktu dang belh phûtnaah hian Champhai Joint Action Committee din a ni a, Committee chairman atan Champhai District V/C Association chairman K Lalmawia ruat niin, secretary atan NGO Coordination Committee secretary Dr Lal-dinthara ruat a ni.

April 21 tlaia Vengsang YMA Hall-ah pawl hrang hrangte ṭhukhawm chuan resolution an pass a; Champhai-in harsatna a tawh laia an district-a MLA pangate'n anmahni ngaihsakna thu an sawi loh avangin MLA-te chu báng vek turin an phût tih an tarlang.

Mizoram sorkar chu tun kar chhung ngeia doctor dah turin an phût a, police-te kut tuar zirlaite zangnadawmna pe turin sorkar an phût thu leh, sorkarin chak taka a bawhzui loh chuan Champhai District Joint Action Committee-in an thil phût chu na zawka nawr an tum thu an tarlang bawk.

Hetih lai hian, April 20 leh 21-a Champhaia lungawi lohna lantirtute'n thil an tihchhiat hlut zawng chu chhût chhuah a la ni lo a; April 20 bika Champhai DC Complex-a car leh bike pakhat hâl chhiat tâk hlut zawng chu cheng nuai 16 vela chhût a ni. DC pisaa thil tihchhiat leh April 21-a Bethel Venga Circuit House-a thil tihchhiat hlut zawng erawh chhût chhuah a la ni lo.