Mi kut tuar nia hriat police thi

Suangpuilawna Police post-a duty 2nd. IR battalion constable Roluahpuia (37) s/o Hrangchungnungi, Electric Veng, Aizawl chu April 22, 2017 zing dar 8:15 khan Aizawl Civil Hospital-ah a thi a, mi kut tuar nia hriat a ni.

Thu dawn danin, Roluahpuia leh a thawhpui MC Zosangliana te chu April 19, 2017 tlai khan an duty-na post-a an inhnial leh an inhau thâwm hriat a ni a, an thawm hriate'n an ngaihven zui lo. Chumi hnu deuhah mi dangin Roluahpuia chu chhuata nikhaw hre loa a awm an hmu a, a lu leh bek veilamah a hliam a, Aizawl Civil Hospital panpui niin, ICU-ah enkawl nghal niin an sawi.

Roluahpuia thih chungchangah hian Darlawn Police Station-ah thubuai ziah luh a ni a, MC Zosangliana chu thu zawhfiah atan police-in an kawl mek a ni.