Aizawlah kâng chungchang zirho

Indian Medical Association (IMA) Mizoram State Branch leh National Academy of Burns India (NABI) chuan, April 21, 2017 zan khan Aijal Club-ah kâng chanchin zirhona an buatsaih.

Zirhonaah hian NABI aṭangin Dr Jyotirmay leh Dr Dibyajyoti Bora te leh Aizawl Civil Hospital aṭangin Dr Samuel L Sailo ten thil pawimawhte an sawi a; khawvela thihna thlentu tam ber chu lirtheia chetsualna a ni a, a dawttu chu kângmei a nih thu an sawi.

An sawi danin, India ramah kum tin mi nuai 70 vel an kan avangin damdawi-inah admit an ni a, mi 2,50,000 vel ramtuileiloin an awm phah ṭhin anga chhût a ni.

Mizorama Aizawl Civil Hospital (ACH)-a kum nga chhunga kângmei vanga admit-te zir chianna neih a ni a; kum nga chhung hian kângmei vanga hliam mi 78 enkawl tawh niin, mipa 51 leh hmeichhia 27 an ni a, an zinga pakua chu an thi a ni. ACH-a kâng hliam admit-te chu November leh March inkarah an tam ber a, March thlaah tam berin, July thlaah an tlem ber thung.

Kum nga kal ta chhunga ACH record-a a lan danin, kâng hliam an enkawl zinga 36.4% chu tui soin a kan an ni a, 36.4% chu meiin a kan an ni. Electric vanga kâng 25.6% leh chemical burn 3.8% an awm bawk. Kâng thlen chhan zinga 95% vel chetsualna vang a ni.