Darzo-ah Liandala sûlhnute zirho a ni

Mizo hla phuah thiam leh zirtirtu hmasa Liandala pualin Liandala Monument Committee, Darzo leh SCERT chuan April 21, 2017 khan Darzo khuaah 'State level seminar on Liandala sûlhnute' tih an buatsaih a, Liandala tute zinga mi, parliamentary secretary Joseph Lalhimpuia'n a hmanpui.

Liandala hi kum 1945–1963 chhung Darzo khuaah zirtirtu leh headmaster hna thawkin a awm a, Darzo-a a awm laia a in hmun chu Darzo khawtlangte'n humhalhin, a dam laia a chenna in ang deuhin Liandala Rûn an sa a, chu chu April 21 khan a fate pahnih - Rev.Dr. PL Lianzuala leh Rev. PC Muanthanga ten an hawng. Amah hriatrengna monument chu a fapa Saingenga'n a hawng thung.

Seminar hun khatna chu Liandala khawsakna ṭhin Darzo tlangah hman a ni a, Mizo High School Pipe Band-in Liandala hla phuah 'Pi Pu Chhuah tlang hlui' tih an rem a, 'Tuibuhdeng' a taka entir a ni bawk.

Hun hnihna chu Darzo community Hall-ah hman niin, 'Liandala sûlhnute’ tih thupui zirho a ni a; Lunglei College associate professor C Zairemthanga leh C Lalnunchanga ten paper an buatsaih zirho a ni.

He hunah hian Darzo khaw mipui te, Liandala tu leh fate , Pachhunga University College, Serchhip College, Lunglei College, J Buana College, HATIM, Hnahthial College, Baptist Higher Secondary School zirlai te, research scholar-te leh thu leh hla lama tui mi 300 vel an tel a ni.