Dy.CM-in invenna hmanrua a vailiam

Swachh Bharat Mission (Grameen) hnuaia Covid-19: Sanitation Package chu nimin khan PHE changtu deputy chief minister Tawnluia'n a pisa aṭangin a vailiam.

Inkhawm hi PHE secretary Sangchin Chinzah-in a kaihruai a; Tawnluia chuan, Covid-19 dona kawngah mipui leh sorkarin theihtawp chhuahin hma an lâk thu sawiin, "India ram sorkar pawhin a ram mipuite chhawmdawlna kawngah theihtawp a chhuah mek zel. State sorkarte pawh kawng hrang hrangin theihtawp chhuah turin a ti a, chu'ng zinga hmalakna chi khatah sanitation worker-te hi hri léng laka an invenna tur ngaihtuahsak ṭulin a hria a ni," a ti.

Dy. Chief Minister chuan, bawlh­hlawh buaipuitute chu frontline worker an nih angin an invenna tur hmanrua ngaihtuahsak a ṭul tih sawiin, "Sorkar laipuiin Covid-19 vang hian faina lama hnathawktute a ngai pawimawh em em a, hri léng karah him taka an thawh chhunzawm theih nan SBM (Grameen) hmalakna hnuaiah invenna hmanrua ngaihtuahsak turin state sorkar a hriattir a ni," a ti. PHE deparment-in thingtlang khaw 692-a village WATSAN committee-te hnena sem chhuah tur hmanrua a lei thu a sawi.

Tawnluia chuan, khaw 692 zinga khaw 77-ah quarantine centre siam a nih thu sawiin, "Quarantine centre awmnaa hman tur bik PPE, protective cap, protective shoe cover, examination glove leh hand sanitizer-te pek tura ruahman a ni. Khua zawng zawnga SBM (Grameen) hnuaia sanitation hna thawktute tan hmai tuamna leh disin­fectant pek tura ruahman a ni bawk," a ti.