Covid-19 in rin phâk bâkin harsatna leh buaina min thlen - Health Minister

Health & Family Welfare minister Dr R Lalthangliana chuan, Covid-19 hripuiin rin phâk bâkin harsatna leh buaina a thlen thu a sawi a, "Mizoram sorkar chuan mipui hriselna a ngai pawimawh hle," a ti.

Health Minister nimin khan West Phaileng damdawi-in (PHC) a tlawhnaah thu sawiin, "Covid-19 hian rin phâk bâkin harsatna leh buaina a thlen a, he hripui vang hian tun dinhmunah chak taka hna thawh theih ni rih lo mah se, ram hmasawnna turin theihtawp chhuaha hmalak zel a ni," a ti a; staff nurse 200 lak tum pawh hri léng vangin hmalakna a ṭhuanawp thu a sawi.

Covid-19 test result chhuak hnuhnung bera mi 1,157-te'n an vei lo tih hmuh a ni chu chanchin lawmawm tak a nih thu sawiin R Lalthangliana chuan, "Result lawmawm tak kan hriat rualin inthlahdah thei erawh kan ni lo. Hripui laka kan himna tura mi inpe - task force, police leh he lam kawnga thâ thawhtu zawng zawng chungah lawmthu ka sawi a ni," a ti.

Dr R Lalthangliana chuan, Mamit district chu sorkar laipuiin district chawikàn ngai bik (aspirational district) a thlan 117 zinga mi a nih thu sawiin, "Sorkar laipui leh Mizoram sorkarin district hmasawnna turin theihtawp chhuahin hma a la reng a ni," a ti bawk.

Bialtu MLA Lalrintluanga Sailo pawhin thu sawiin, khawvelah Covid-19 vanga thi mi tam tak an awm laia Mizoramah nunna chán an la awm lo chu lawmawm a tih thu a sawi a, "Covid-19 do nan leh a vei mekte enkawlna kawngah Mizoram sorkar hmalakna hi rintlak leh fak phu a ni," a ti a; hripui dona kawngah inpuhmawh mai lo a, lungrual taka kal turin a bial mipui a sáwm.

Inkhawma tel West Phaileng, Phuldungsei leh Marpara-a doctor-te chuan thawktu indaih loh thu te, ambulance leh generator an mamawh thute leh staff quarters leh in sak thar leh thawm ṭhat an mamawh dante Health Minister hnenah an thlen a ni.